88 歲婆婆, 跟她的兩個女兒走進診症室, 看來精神奕奕, 步履平穩。
這是下午的老人科門診。
「婆婆, 有無乜野唔舒服呀? 」婆婆一邊坐下, 我一邊問她。
「醫生, 佢成日話個肚痛呀, 你幫佢睇吓? 」女兒率先發言。
「係呀, 睇吓邊度痛? 」我俯身向婆婆方向準備檢查。
「係呀, 成年嗱。食完中午飯就痛, 其他時間唔痛㗎。。。嗱, 你睇, 呢度呀。。。」婆婆拿起毛衣, 用手指着肚的左上方。
「會唔會胃痛? 」我提出。吃完東西腹痛或許是胃酸分泌過多, 導致胃炎或胃潰瘍。
「佢睇過私家醫生, 買咗啲胃藥都無用。。。同埋, 佢幾個月都照過胃鏡, 都話無事。」女兒似乎很清楚媽媽的情況。
翻看電腦資料, 婆婆的確之前照過胃鏡, 只有輕微胃炎, 亦被處方强力胃藥。
之前醫生亦安排了婆婆照腹部照聲波, 不過預約期在年底。
「醫生, 不如你轉介佢去睇精神科, 佢根本係心理影響㗎。」女兒突然說。
「婆婆, 你唔開心咩? 」我轉身問。我這個問題也很合情合理吧!
「邊有呀, 佢地成日話我心理病之嘛。」婆婆扁着嘴。
「佢成日話個度痛, 驚自己生腸癌呀, 所以唔開心。」女兒續說。
「我驚肚痛係因為條腸有事嘛, 佢地係咁話我無事, 係自己嚇自己, 係咁話我係心理病。 好煩呀佢地。」被標籤有心理病, 總覺得不是味兒, 甚至開始自我質疑。
「咁你有無大便唔正常, 疴血疴潺個D呀, 或者體重輕咗食唔到嘢? 」我再問。
「咁又無。。。」
「咁又唔似大腸有嘢喎。不過咁, 嗱, 我講如果萬一, 你真係大腸生咗個瘤, 你仲開唔開刀先。」
「唉吔, 我成90歲啦, 緊係唔開一刀啦。」婆婆答得肯定。
「咁仲驚乜野喎。宜家又唔似有野, 就算有野你又唔諗住做手術嘅。」
「。。。咁又係。。。哈哈!」婆婆想了一想, 笑着說。
「我幫你抽啲血睇埋啦不如。」與其擔心, 不如多做一點。大腸癌腫瘤會有機會出血, 做成貧血, 驗血可以看出來。
作為醫生, 或許最有用的, 就是能夠看清全局, 知道在什麼時候, 需要做那些, 不需要做那些, 再為老友記提供最佳的醫療意見。
所以, 當你有疑問, 感到困惑, 想問問意見, 無謂收在心中, 不坊坦白告訴醫生, 讓他能為你解答。
Search